O Máster Propio da UDC en Criminoloxía (MCrim) é a primeira oferta formativa de posgrao en materia criminolóxica do Sistema Universitario Galego. Xa que logo, é un título de posgrao adaptado ao estudo da criminalidade, da desviación e dos conflitos na nosa realidade social, que ten particularidades diferenciais en relación coas grandes cidades españolas e europeas.

O MCrim ten unha marcada orientación interdisciplinaria, o que o fai axeitado para estudantes con formación en eidos diversos, como o Dereito, a Psicoloxía, a Socioloxía ou o Traballo Social, entre outros. Ao tempo, o MCrim ofrece unha formación teórica, pero tamén empírica e pragmática, polo que é especialmente apropiado para persoas que teñan comezado, ou queiran comezar, unha carreira profesional nos eidos do sistema penal –policía, tribunais, execución de penas- ou da asistencia e os servizos sociais. No marco dun posgrao semipresencial dun ano de duración, o MCrim proporciona a ese estudantado e profesionais un coñecemento especializado sobre unha ampla pluralidade de problemas e conflitos sociais e sobre o xeito de gobernalos, con especial atención á delincuencia e á penalidade. 

O MCrim susténtase no elevado nivel de coñecementos en materia criminolóxica acumulados por parte de diversos equipos de investigación da UDC, que gozan dun significado recoñecemento internacional. No MCrim, estes equipos académicos estruturan a oferta formativa en diálogo con outros profesionais e co propio estudantado, nun título que fai da construción colectiva de saberes un dos seus sinais de identidade.

12 xullo ao 3 de setembro de 2021

Coa preinscrición pódense solicitar as dúas bolsas do 50% do prezo da matrícula

8 ao 15 de setembro de 2021

Matrícula

15 de setembro de 2021 ao 17 de xuño de 2022

Impartición

A modalidade de impartición é semipresencial. As sesións presenciais desenvolvense na aula 16 da Facultade de Dereito da UDC (Campus de Elviña)